Hringheimar

Í sumar taka Safnasafnið á Svalbarðsströnd og Listasafnið á Akureyri saman höndum í verkefninu „safn í safni“ en það byggist á því að sýna hluti úr safneign eins safns í öðru safni og varpa þannig ljósi á menningarsöguleg tengsl safnanna.

Safnasafnið sýnir nú verk Katrínar Jósefsdóttur (Kötu saumakonu) sem eru eigu Akureyrarbæjar og laugardaginn 2. júlí opnar Listasafnið á Akureyri sýningu sem ber heitið Hringheimar og samanstendur meðal annars af fjölmörgum verkum úr safneign Safnasafnsins sem skipt hefur verið upp í fimm smærri sýningar. Sýningarstjórar eru Harpa Björnsdóttir og Níels Hafstein

Sýningarnar búa yfir vitneskju um margs konar hringferla sem hverfast um íslenska myndlist, afmarkaða kima jafnt sem fjölfarin svæði, og birta mismunandi viðhorf, staðhætti og skoðanir. Í gömlu handritunum er heimssýnin ýmist víðtæk eða þröng og sérviskuleg, jafnvel bernsk; í grafíkverkunum og teikningunum kallast markviss vinnubrögð og öguð framsetning hugmynda og val á efni á við tilviljun stundarinnar og hrifnæmi augnabliksins. Í skúlptúrunum er sótt til eldri reynslu og þeir lagaðir að samtímanum, og í einni sérsýningunni er leitast við að gefa myndhugsuninni áþreifanlegan blæ og farið fram á ystu nöf í miðlun áhrifa sem verða til við nýjar lausnir í leikföngum, vísindum og tækni. Svo breitt tjáningarsvið fellur vel að stefnu Safnasafnsins, sem leitast við að eignast verk eftir alþýðulistamenn, börn, hagleiksmenn og einfara, sem og framsækna listamenn sem gera tilraunir sem skara alþýðulist eða eru unnin með þjóðleg minni í huga.

2000 mílur að heiman (Jan Voss 1974, offset prentþrykk, 29,1 x 24,7 cm)

Safnasafnið – Alþýðulist Íslands

Safnasafnið var stofnað 1995 af Magnhildi Sigurðardóttur og Níelsi Hafstein, í gamla Þinghúsinu á Svalbarðsströnd við Eyjafjörð, en síðan hefur það stækkað umtalsvert og starfsemin orðið viðameiri.

Sýningar Safnasafnsins hafa byggt á nýstárlegri hugsun þar sem alþýðulist og nútímalist mynda fagurfræðilegt samspil, og einstök tengsl heimilis, safns og garðs hafa opnað augu fólks fyrir fegurð mismunandi hluta og innbyrðis samhengis allrar sköpunarþrár.

Í Safnasafninu má sjá verk eftir sjálflærða alþýðulistamenn jafnt og framsækna nútímalistamenn, börn sem fullorðna – þar má finna málverk, skúlptúra, útsaum, teikningar, líkön, minjagripi, brúður, verkfæri og leikföng, auk áhugaverðs bókasafns. Árlega eru settar upp nýjar sýningar sem hafa það að markmiði að skerpa á myndhugsun eða ögra gestum safnsins og þar er varpað birtu á hina ýmsu kima og hringferli sköpunar.

Vestursalur:
Karlaklefinn
Grafík, teikningar, höggmyndir
100 verk eftir 50 höfunda

Myndbandsherbergi:
Magnús Pálsson, Reykjavík
Hljóðinnsetning

Gangur:
a)
Harpa Björnsdóttir, Reykjavík
Leir, útsaumuð ljósmynd
b)
Ragnheiður Ragnarsdóttir, Reykjavík
Málverk

Miðsalur:
Níels Hafstein, Svalbarðsströnd
Innsetning

Austursalur:
Vitnað í handrit
a)
Jón Bjarnason (1791-1861), Þórormstungu í Vatnsdal og fleiri
Teikningar, stækkaðar ljósmyndir úr handritum

b)
Ólöf Nordal, Reykjavík
Gifsverk

c)
Steinunn Bergsteinsdóttir, Mosfellsbæ
Mósaíkverk

d)
Kristján Loftur Jónsson, Akureyri
Leirverk
Margrét Baldursdóttir, Grýtubakka I, Akureyri
Leirverk
Verk unnin á Handverksmiðstöðinni Punktinum, Akureyri
Umsjón: Sigríður Ágústsdóttir, leirkerasmiður, Akureyri